बझाङका विद्यालयमा शिक्षकको अभाव

दरबन्दी अनुसारका पर्याप्त शिक्षक नहंँदा बझाङ जिल्लाका विद्यालयको पठनपाठनमा समस्या हुँदै आएको छ ।

समयमै पाठ्यपुस्तक पाउन नसकेर पठनपाठनको समस्या झेलिरहेका छात्रछात्रा विद्यालयमा आवश्यकता अनुसार शिक्षक नहुँदा पढाइमा बाधा पुग्ने गरेको स्थानीय शिक्षक नरेन्द्र उपाध्यायले बताउनुभयो ।

प्राथमिकदेखि माध्यमिक तहसम्मका जम्मा ४५९ विद्यालय रहेको बझाङ जिल्लामा विद्यार्थी सङ्ख्याको अनुपातमा शिक्षक दरबन्दी निकै न्यून हँुदा सहजरुपमा पठनपाठन गराउन समस्या भएको जिल्ला शिक्षा कार्यालयले जनाएको छ ।

जिल्लाका सबै विद्यालयमा गरी २५० जना भन्दा बढी शिक्षक अपुग रहेको अवस्थामा कतिपय विद्यालयको पठनपाठनलाई सहज बनाउन विभिन्न खालका समस्या सिर्जना भइहरेको जिल्ला शिक्षा अधिकारी मदनकुमार थापाले बताउनुभयो ।

प्राथमिक तहमा बालकक्षाको अनुभव प्राप्त शिक्षकको व्यवस्था हुनुपर्ने सरकरी नीति नियम भए पनि जिल्लाका १६६ विद्यालयमा अझैसम्म पनि बाल कक्षा शिक्षकको व्यवस्था हुन सकेको छैन । जसका कारण बालबालिकालाई बालमैत्री अवधारण अनुसार शिक्षा प्रदान गर्न समस्या भएको बताइएको छ ।

सदरमुकाम आसपासका विद्यालयमा शिक्षक दरबन्दी प्रर्याप्त भए पनि विकट ग्रामीण क्षेत्रका विद्यालयमा भने दुई - तीनजना शिक्षकको भरमा निम्न माध्यामिक तथा माध्यामिक तहसम्म सञ्चालन गर्नुपरेको जनाइको छ ।

• Tags:
• Bajhang