राईका सम्झनामा रु चार लाखको छात्रवृत्ति अक्षय कोष

उर्लाबारी (मोरङ), १८ असोज । शिक्षा क्षेत्रमा पुर्याएको योगदानस्वरुप उर्लाबारी–३ स्थित राधिका माविका तत्कालीन प्रअ स्व दिलीप राईका सम्झनामा रु चार लाख बढीको छात्रवृत्ति अक्षय कोष स्थापना गरिएको छ ।

उर्लाबारी परिवार हङ्कङले स्व राईको स्मृति दिवसका दिन वितरण गर्ने गरी छात्रवृत्ति अक्षय कोषको स्थापना गरेको अध्यक्ष विकास सुब्बाले जानकारी दिनुभयो । संस्थाले उर्लाबारीको कुमारी बैंकमा रु चार लाख ३० हजार राखेको र त्यसको ब्याजबाट प्रत्येक वर्ष उर्लाबारी नगरभित्र रहेका सामुदायिक विद्यालयबाट कक्षा १० मा उत्कृष्ट अङ्क ल्याउने एक एक छात्र र छात्रालाई छात्रवृत्ति वितरण गरिने छ ।

उर्लाबारीमा शिक्षा क्षेत्रमा राईले पुर्याएको योगदानलाई सधैँ स्मरणीय बनाउन कोषको स्थापना गरिएको संस्थाका नेपाल प्रतिनिधि राजु लामाले बताउनुभयो ।