क्याम्पसमा गरिएको तालाबन्दी २८ दिनपछि खुल्यो

बैतडी, ९ असोज । दार्चुलाको लटिनाथमा रहेको लटिनाथ क्याम्पसमा गरिएको तालाबन्दी २८ दिनपछि आज खोलिएको छ । तालाबन्दी गर्ने पक्षले क्याम्पसमा लगाएको ताला खोलेको हो ।

क्याम्पसमा नियमानुसार साधारण सभा नबोलाएको, सञ्चालक समिति गठन नगरेको जस्ता कारण देखाएर असन्तुष्ट अभिभावकले गत भदौ १४ गते क्याम्पसमा तालाबन्दी गरेका थिए ।

लटिनाथ क्याम्पसको नियमावली २०६६ मा प्रत्येक तीन वर्षमा नयाँ सञ्चालक समिति गठन गर्नुपर्ने, प्रत्येक वर्ष साधारण सभा बोलाउनुपर्ने व्यवस्था गरिएको भए पनि त्यसो नगरेको असन्तुष्ट अभिभावकको आरोप छ ।

तालाखोलेसँगै असन्तुष्ट अभिभावकहरुले क्याम्पसमा भइरहेको बेथितिविरुद्ध कानुनी प्रक्रिया सुरु गरिसकेकाले तालाबन्दी खोलिएको स्थानीय अभिभावक दिनेश सिंहले जानकारी दिनुभयो ।

विद्यार्थीको पठनपाठनलाई ध्यानमा राखेर ताला खोलिएको र आफूहरुको आन्दोलन जारी रहेको विज्ञप्तिमा जनाइएको छ ।

यसअघि क्याम्पसमा गरिएको तालाबन्दी खोल्ने विषयमा दुबै पक्षबीच पटक पटक छलफल भए पनि सहमति हुनसकेको थिएन।

क्याम्पसमा गरिएको तालाबन्दी खुलेसँगै अब क्याम्पसमा पठनपाठन सुरु हुने बताइएको छ ।