शिक्षा दिवसमा पुरस्कृत हुने विद्यालयको नाम सार्वजनिक

काठमाडौँ, २० भदौ । सरकारले यस वर्षको ३७ औँ राष्ट्रिय शिक्षा दिवसमा पुरस्कृत हुने निजी तथा सामुदायिक विद्यालयको सूची आज सार्वजनिक गरेको छ ।

शिक्षा मन्त्रालयले सार्वजनिक गरेको सूचीअनुसार सामुदायिक विद्यालयतर्फ कास्कीको शितलादेवी सामुदायिक विद्यालयले राष्ट्रिय सिल्ड, ध्वजा, प्रमाणपत्र र रु दुई लाखको पुरस्कार पाउने भएको छ । दिवस यही भदौ २३ गते मनाइनेछ ।

त्यसैगरी क्षेत्रीयस्तरमा राष्ट्रिय सिल्ड, ध्वजा, प्रमाणपत्र र रु एक लाखसहित प्रत्येक विकास क्षेत्रबाट एक - एक वटा सामुदायिक विद्यालय पुरस्कृत हुनेछन् । तिनमा पूर्वाञ्चलबाट बरुणेश्वर मावि (ओखलढुङ्गा), मध्यमाञ्चलबाट नारायणी मोडल सेकेण्डरी स्कुल (भरतपुर चितवन), पश्चिमाञ्चलबाट गणेश मावि नारायणस्थान (बागलुङ), मध्यपश्चिमाञ्चलबाट गुरु मावि (मुगु) र सुदूरपश्चिमाञ्चलबाट भगवती मावि तलरा (डोटी) तथा दुर्गम क्षेत्रबाट खुम्जुङ मावि (खुम्जुङ सोलु) छन् ।

निजी विद्यालयतर्फ ग्रेडेड इङ्लिस मिडियम स्कुल (जेम्स) ललितपुर राष्ट्रिय सिल्ड, ध्वजा, प्रमाणपत्र र नगद रु दुई लाखबाट सम्मानित हुने भएको छ । क्षेत्रीयस्तरमा पाँच विकास क्षेत्रबाट एक एक र एक निजी विद्यालयले रु एक लाखसहित सिल्ड र प्रमाणपत्रसहित सम्मानित हुने भएका छन् ।

पत्रकार सम्मेलनमा शिक्षामन्त्री धनीराम पौडेलले शिक्षाको पहुँच र गुणस्तर बढाउन यी पुरस्कारले टेवा दिने विश्वास व्यक्त गर्नुभयो । उहाँले सरकारले आगामी दिनमा गुणस्तरीय शिक्षातर्फ ध्यान दिन निवर्तमान शिक्षामन्त्री गिरिराजमणि पोखरेलका योजनालाई निरन्तरता दिने बताउनुभयो ।

दिवसको नारा ‘समृद्ध राष्ट्र निर्माणका लागि जीवनोपयोगी शिक्षामा लगानी’ रहेको छ ।

मन्त्रालयका सहसचिव डा हरि लम्सालले दिवसको अवसरमा राष्ट्रपति विद्यादेवी भण्डारीले नेपाल विद्या भूषण ‘क’, ‘ख’ र ‘ग’ तथा नेपाल छात्रा विद्या पदकबाट विभिन्न व्यक्ति तथा विद्यार्थीलाई विभूषित गर्ने कार्यक्रम रहेको जानकारी दिनुभयो । जसमा नेपाल विद्याभूषण पदक ‘क’ १९०, नेपाल विद्याभूषण पदक ‘ख’ ८१, नेपाल विद्याभूषण पदक ‘ग’ १५,, नेपाल छात्रा विद्या पदक ‘क’ २६ र नेपाल छात्रा विद्या पदक ‘ख’ बाट ४ जना विभूषित हुनेछन् ।