केवल जय भगवती छात्रवृत्ति पुरस्कार

काठमाडौँ, ३० साउन । हात्तीवन सामाजिक सेवा केन्द्र काठमाडौंँले दक्षिणकाली नगरपालिका अन्तर्गत सामुदायिक र संस्थागत विद्यालयबाट २०७२ सालको प्रवेशिका परीक्षामा उत्कृष्ट स्थान हासिल गर्ने छ विद्यार्थीलाई शनिबार केवल जय भगवती छात्रवृत्ति पुरस्कारस्वरुप जनही रु तीन हजार सहित शब्दकोश र प्रमाणपत्र प्रदान गरेको छ ।

यहाँ आयोजित कार्यक्रममा केन्द्रबाट छात्रवृत्ति पाई प्रवेशिका उत्तीर्ण गरेका १३ विद्यार्थीलाई पनि पुरस्कारस्वरुप झोला र प्रमाणपत्र तथा नेत्रहीन अध्ययनरत संस्था निब्दाका त्यत्तिकै विद्यार्थीलाई शैक्षिक सामग्री र छैमलेका एक घाइतेलाई ह्विल चेयर्स वितरण गरियो ।

सो अवसरमा सांसद राजेन्द्रकुमार केसीले जनताको शिक्षा र आर्थिक अवस्था सुधार गर्न सरकार मात्र नभई सामाजिक सङ्घसस्था पनि लाग्नुपर्ने बताउनुभयो । केन्द्रका अध्यक्ष प्रमी श्रेष्ठले विद्यार्थीलाई प्रोत्साहन र सम्मान गरेर आफूहरुले यस क्षेत्रको शिक्षाको स्तर उकास्न सहयोग गरेको जानकारी दिनुभयो ।